MAHALABIU: LAYAT KAYA GATAH LUM

  • Whatsapp
MAHALABIU; LAYAT KAYA GATAH LUM
Ilustrasi | Rafii Syihab

JADI takisah kaini, limbah datang bajum’at, Utuh Habang lakas mambawa daging kurban ka rumah.

“Dikitnya, ka,” ujar Aluh Katuyung rahat manyambut daging kurban bawaan lakinya, “Plastik gula haja kada hibak nah.”

Read More

“Saikungannya sapi tahun ini nang disumbalih, ding ai, itu gin babagi tujuh RT,” ujar nang laki manyahuti.

“Syukur jua pang dapat leh, ka.”

“Iya am, ding ai, disyukuri ai nang ada—“ Utuh Habang duduk di higa bininya, “Masaki ai ding ai lakasi, lapar sudah aku nah.”

Saitu-saini Aluh Katuyung tamandam. Nang ngarannya binian wahini, mana kawin anum banar pulang, Aluh Katuyung ni kada bisa maharagu daging salain babanam.

“Kita ulah sate haja lah, Ka,” jar nang bini.

“Jangan ding ai. Rarampahan ada ha kalu di dapur. Barang ai saraba batungkah. Aku kada handak lamun babanam,” nang laki manyahuti.

“Ulun kada bisa ka ai, kalu pina kada nyaman,” Aluh Katuyung baucap, “Kita julung wadah mama haja kah yu?”

“Kada supan lah lamun ta ka mama?”

“Supan pang ulun.”

“Takuni haja rarampahannya lawan mama, limbah tu ulahi saurang di rumah, lawasi mamasaki supaya kada layat. Nyaman haja tuh jadinya, “ nang laki mauyun.

“Ayu ai lamun kahandak pian kaitu. Sambil balajar jua ulun nah.”

 

***

 

Sambil maingatakan napa nang dipadahi mama mintuha, Aluh Katuyung mamasaki daging di rinjing. Buat bawang putih, bawang habang, sarai, tipakan, laus, janar, piksin, gula, asam kamal.

“Apa lagi ti lah?” Aluh Katuyung bagarunum.

“Uh, uyah tatinggal,” jar inya manjawab patakunannya saurang.

Kada lawas, daging sapi nih rasa lamah hudah diigut. Tagal banyunya sing banyakan lagi. Maka dagingnya jua bilang sadikit banar.

“Nah, ada akal,” ujar Aluh Katuyung kada saapa limbah malihat rinjingnya nang pina puang.

 

***

 

Bangsa satangah jam labih-labih limbah nitu, kumpur dimatii ulih Aluh Katuyung. Masak pinanya hudah, ujarnya dalam hati.

“Ka, uh, ka,” Aluh Katuyung bakiyauan, “makanan ka…”

Mandangar nang bini bakiyau, lakas Utuh Habang nih datang ka dapur. Pina manggangsing kaya kucing kada dibari makan talu hari.

“Han mau ha kalu masak, ding?” ujar nang laki.

“Hehe, balajar, ka ai.”

“Inya mun kada dicuba kadanya bisa pang,” Utuh Habang baucap.

“Pina masin pang sadikit parasa ulun ti, ka ai.”

“Biar ha masin-masin sadikit tih, nyaman kada haran iwak.”

Pas disuapan partama, takurijat langsung Utuh Habang. Masakan bininya sakalinya masin pada banyu paluh. Handak maluak, kada nyaman pulang lawan bini.

“Nyaman ding ai,” ujar Utuh Habang, “tagal kamasinan banar ai sadikit.”

Aluh Katuyung lihum.

Nang kadua, Utuh Habang maambil himpilan daging nang taganal. Dilihat-lihat, warna dagingnya pina putih pucat. Bingung Utuh Habang nih, kanapa bisa kaitu, ujarnya. Pas disuapnya, layat. Batuhukan diigut iya kada kawa jua. Lajur ditaguknya saganal nang ada nitu.

“Kanapa daging masakan pian nih balainan kaini yu ding. Sapalih lunyut, sapalih layat kaya gumpalan gatah,” ujar nang laki.

“Hehe, ulun buati sadikit ka ai, manambahi daging sapinya,” ujar Aluh Katuyung bagimit.

Mandangar jawaban bininya, Utuh Habang kasadakan saitu-saini.

Limbah nitu, badua laki bini tu manyubalah wadah kuitan Utuh Habang, mancari daging nang tanyaman pada gatah lum.

Avatar

Related posts

Leave a Reply

Your email address will not be published. Required fields are marked *