MAHALABIU: PASAWAT, MINTA DUIT

  • Whatsapp
MAHALABIU: PASAWAT, MINTA DUIT
Ilutrasi | Merdeka.com

BAISUKAN hari, rahat Masmurah hanyar tuntung manurih gatah, inya duduk di atas karung nang diamparnya gasan kadudukan dua ikung anaknya. Kada jauh pada kadudukan nitu, lakinya duduk maasah lading panurihan.

Kada saapa, pasawat tarabang di atas kapala, bunyinya nyaring tadangar.

Read More

“Pasawat minta duit,” ujar Masmurah bakuciak sambil batangadah ka atas.

Limbahnya sambil lihum Masmurah manyuruh dua ikung anaknya bakuciak jua maminta duit lawan pasawat.

“Hakun garang inya mambari, Ma?” ujar nang taanum.

“Hakun banar,” Masmurah manyahuti.

“Suah garang pian dibarinya, Ma?” nang tatuha basuara.

“Rancak,” ujar Masmurah sambil mamakan gabin karing.

Mandangar nitu, nang badua baading baliliatan satumat. Limbahnya kaduanya bakuciak tapaimbai.

“Pasawat minta duit.”

“Capati pasawat!”

Kada sawat mambari duit, pasawat langlam masuk ka dalam rakun. Nang badua baading langsung hinip, bacari ka atas mahadang kalu pang ada duit tarabang matan pasawat nang dikiaunya.

“Kanapa kami kada dibarinya, Ma?” ujar nang anak.

Masmurah batukup muha, manahani tawa.

“Dikaramputi mama…!”

“Nah kada parcayaan buhan kam nih, cuba lihati rumah bubuhan nang parak lawan parkiran pasawat tuh na, ganal-ganal kalu? Sugih-sugih kalu buhannya tu? Itu tuh buhannya jadi sugih marga rancak am maminta duit lawan pasawat. Buhannya nyaring-nyaring bakuciak,” ujar Masmurah.

“Bujur kaitulah, Bah?” ujar nang kaka manakuni abahnya.

“Kada tahu jua aku. Bujur ai kalu,” ujar nang abah sambil lihum.

“Jadi kita ni kada baduit marga jauh pada parkiran pasawat lah, Bah?” ujar nang ading batakun.

Masmurah kada kawa lagi mahahani tatawanya.

 

Sungai Pinang, Agustus 2020

Avatar

Related posts

Leave a Reply

Your email address will not be published. Required fields are marked *